!! అనువాద కవి !!

అంతా కవిత్వమే!

జీవన ప్రవాహమిలా
పాయలుపాయలుగా చీలకముందు
దేహము ప్రాణము కలిసి పాడిన స్వఛ్చసంగీతం

వెలుగుకాని
చీకటికాని
విభజనరేఖపై నిలబడి
వింతకాంతితో స్పృశించిన సందిగ్ధం

లోలోపలి రహస్యదారులపై రాలినపూలు
నిన్నటిదాకా మాట్లాడిన భాష

నగ్నదేహాన్ని పదేపదే తాకుతూ
అదృశ్య రక్షాకవచాన్ని కప్పిపోతూన్న
ఒక్కో మంచుఋతువు వాత్సల్యం

కనురెక్కలనంటి
సుదూర గమ్యాన్ని స్వప్నిస్తోన్న కల

అంతా కవిత్వమే..
అక్షరాల్లోకి తర్జుమా చేస్తూ నేనో అనువాదకున్ని.