Tuesday, July 30, 2013

ఉదయం

కరగిపోయె కలయని
కలవరపడకు నేస్తం
కనులు తెరచి చూడు
తూరుపు కనబడుతుంది

చెదరిపోయె మనసని
చింతించకు నేస్తం
చిరునవ్వున చూడు
చెంతకు తిరిగొస్తుంది

వెడలిపోయె వెలుగని
వేదన వరియించకు నేస్తం
వేయి సూర్యులతోటి 
వేకువ ఎదురొస్తోంది  

Friday, July 26, 2013

చినుకులూ..చిత్రాలు..

కిటికీ పక్కన కూచొని
కాఫీ తాగుతూ నీ తలపుల్లో నేను..
కంటికింపుగా కొమ్మమీద
మందారపువ్వు కదులుతూ ఉంది
నీ నవ్వులాగా...
ఉన్నట్టుండి ఊహలన్నీ
గాలిలో మేడలు కట్టి మేఘాలయ్యాయి..
ఒక్క ఉరుముతో ఉలిక్కిపడి
బయటకొచ్చానో లేదో
మోము తాకే ప్రతి చినుకూ
చెలియా..
నీ మోహన రూపమై పలకరించింది...
               .... నవీన్ కొమ్మినేని

Thursday, July 25, 2013

నా మౌనం

చేసుకున్న బాసలు
బాణాలై గుచ్చుతున్నాయి
కలబోసుకున్న ఊసులు
ఉప్పెనలై ముంచుతున్నాయి
కరుణ లేక కన్నీళ్ళు
కాలువలు కడుతుంటే
మాటలు రాక మౌనాన్ని ఆశ్రయించాను...
                     .... నవీన్ కొమ్మినేని

Tuesday, July 23, 2013

నిశ్శబ్దంగా.. నీలా

సమున్నత హిమ శిఖరం అంచు
నా హృదయం లో నీ స్థానం..
కరుగుతున్న మంచు చారికల్లా
నీ జ్ఞాపకాలు..
                ....నవీన్ కొమ్మినేని

Monday, July 22, 2013

ఏకాంత గానం

మోడువారిన చెట్టు
మళ్ళీ చిగురించునేమో
మూగబోయిన మనసు
మళ్ళీ పలికేదెలా.......
               ....... నవీన్ కొమ్మినేని