!! నన్న బెంగళూరు !!

ఒకసారి బెంగళూరు పొయిరావాలి

ఆ పచ్చనినీడల్లో నడుస్తూ
ప్రపంచం నలుమూలల్నుంచి వీచే
గాలుల్ని ఆస్వాదించాలి

లాల్‌బాగ్ తోటల్లో
ఉడతల్నీ మిడతల్నీ పలుకరించి
ఓ ఆదివారపు ఉదయాన్నో సాయంత్రాన్నో
వాటికి కానుకిచ్చి రావాలి

FORUM లో విండోషాపింగ్ చేయాలి
కుదిరితే దానిముందు కూచుని
గజిబిజిగా మనుషులరూపంలో తిరిగే
గందరగోళాన్ని చూడాలి
చూస్తూచూస్తూ
వేడివేడి మొక్కజొన్న పొత్తులు తినాలి
తింటూతింటూ
Paulo Coelho ని చదవాలి


కేఆర్ మార్కెట్ లో
పువ్వులెలా నవ్వుతున్నాయో!
E-city లో
నాతో నడిచిన దారులెలా ఉన్నాయో!
'మెట్రో సవారీ'పై
RJ రష్మి ఏమంటోందో!

ఒకసారి బెంగళూరు పొయిరావాలి

కలలకు రెక్కలిచ్చిన క్షణాలు
కన్నీళ్లకు అర్థం మార్చిన క్షణాలు
అక్కడే పదిలంగా ఉన్నాయి
ఒక్కసారి వాటిని పరామర్శించి రావాలి