Saturday, January 10, 2015

!! ఇల్లు కావాలి !!

ఇల్లొకటి కావాలి

ఏఊరివారినైనా
ఏకాలపు వారినైనా
అడ్డగించకుండా అనుమతించేందుకు
తలుపుల్లేని ద్వారాలుండాలి

ఏరకపు గాలైనా ధారాళంగా లోపలికొచ్చేందుకు
ఉదయాస్తమాల వెలుగుచీకట్లను సమంగా నింపేందుకు
తెరలు లేని కిటికీలుండాలి

నావాళ్లు నానా నమ్మకాలు గలవాళ్లు
ఏనమ్మకపు సువాసనలైనా
నిర్భయంగా తిరుగాడేందుకు
విశాలమైన గదులుండాలి

అలసినపుడొ
ఆవేదన వరించినపుడో
సేదదీరడానికి ఒక చెట్టుండాలి
చెట్టు చుట్టూ సంగీతం పలుకుతుండాలి

పూబాలలు
నాపిల్లలు
అందంగా నిండుగా విరబూయడానికి
సారవంతమైన పెరడొకటుండాలి

నాకొక ఇల్లుకావాలి
నా మనసులాంటి ఇల్లు

కనిపించినపుడల్లా
చిరునవ్వు కరచాలనం చేస్తాను
నెలకో వారానికో రోజూనో
ఒక ఆత్మీయ ఆలింగనాన్ని అద్దెగా ఇస్తాను

నాకొక ఇల్లుకావాలి
అచ్చంగా నా మనసులాంటి ఇల్లు


నవీన్ కుమార్ !! 10/01/2015

2 comments:

Anonymous said...

చాలా బాగుంది.

నవీన్ కుమార్ said...

Thank you Bonagiri garu :)